WAASI WAIZUNGUKA KAMBI YA VIKOSI VYA ANGA SYRIA-TISHIO LA ASSAD KUTIMUI SILAHA ZA SUMU LAONGEZEKA

DAMASCUS-SYRIA,Waasi wameizingira kambi moja ya kikosi cha anga karibu na Damascus, wakati Marekani ikieelezea wasi wasi wake kwamba Rais Bashar al Assad wa Syria anayetapatapa huenda akatumia silaha za sumu kukabiliana na upinzani.
Clinton amesema leo hii kwamba Marekani ina wasi wasi kuwa Rais Bashar al Assad wa Syria ambaye anazidi kutapatapa anaweza kuamuwa kutumia silaha za sumu au kupoteza udhibiti wake kwa silaha hizo.Baada ya kukutana na mawaziri wa mambo ya nje wa Jumuiya ya NATO mjini Brussels Ubelgiji ambapo jumuiya hiyo ya kijeshi ya mataifa ya magharibi imekubali kupeleka Uturuki nchi jirani na Syria makombora ya kujihami ya patriot ambapo hutumika kudukiza makombora yanayorushwa kutoka nje, Clinton amesema serikali ya Marekani imeweka wazi kwa Syria kwamba Marekani itabidi kuchukuwa hatua iwapo nchi hiyo itatumia silaha za sumu.

Waziri wa Mambo ya Nje wa Marekani Hillary Clinton.

Clinton ameuambia mkutano wa waandishi wa habari mjini Brussels kwamba wasi wasi wao Assad anayezidi kutapa huenda akaamuwa kutumia silaha za sumu au akapoteza udhibiti wa silaha hizo kwa mojawapo ya makundi mengi ambayo hivi sasa yanaendesha harakati zake nchini humo.Waasi nchini Syria wamesema leo hii kwamba wameizingira kambi moja ya kikosi cha anga karibu na mji mkuu wa Damascus ikiwa ni ishara mpya kwamba mapigano hayo hayo yanazidi kuunyemelea mji mkuu huo.

Mapigano yapamba moto

Mapigano makali yamezuka karibu na mji wa Damascus wiki moja iliopita na kuvikisha vita hivvyo kwenye kitovu cha utawala wa Assad ambapo huko nyuma vilikuwa vikipiganwa kwenye majimbo. Wapiganaji wamesema wameizunguka kambi ya kikosi cha anga ya Aqraba ilioko kama kilomita 4 nje ya mji mkuu.Abu Nidal msemaji wa kikosi cha wapiganaji waasi cha Habib al Mustafa amesema wanataraji kuiteka kambi hiyo masaa machache yajayo.Ameongeza kusema kwamba waasi wamekiteka kituo cha wanajeshi wa anga kilioko karibu na hapo na kimeuwa wanajeshi kadhaa,kuwatia nguvuni wengine na wengine kadhaa wameweza kukimbia.Habari kama hizo kutoka Syria imekuwa vigumu kuzithibitisha kutokana na serikali kuzuwiya vyombo vya habari kurepoti nchini humo.

Mojawapo ya viunga vya Damascus vilivyoshambuliwa na ndege za Assad.

Mkakati wa wanajeshi ni kuigawa Damascus makao makuu ya utawala wa Assad kutoka viunga vilioko nje ya mji huo ambapo waasi wamekuwa wakizidi kuvidhibiti. Mashambulizi ya anga yamekuwa yakiendelea kwa zaidi ya wiki moja dhidi ya viunga hivyo ambapo wanaharakati wanasema ni mashambulizi makubwa kuwahi kushuhudiwa kwenye viunga hivyo.

Duru za serikali ya Syria zimesema jeshi limeweza kuwarudisha nyuma waasi kwa kilomita 9 kutoka mji mkuu. Waasi hawakuthibitisha wala kukanusha habari hizo lakini wamesema lengo lao haliko katika kuingia wenye mji huo kwa sasa.

Makobombora ya Kujihami kwa Uturuki

Aina ya makombora ya "Patriot " yatakayowekwa katika mpaka wa Uturuki na Syaria.

Kwa upande mwengine uamuzi wa NATO wa kutuma makombora ya kujihami ya Marekani, Ujerumani na Uholanzi kusaidia kuulinda mpaka wa Uturuki utavifikisha vikosi vya Marekani na Ulaya kwenye mpaka wa Uturuki kwa mara ya kwanza kabisa katika mzozo huo wa vita vya wenyewe kwa wenyewe vya Syria viliodumu kwa miezi 20 sasa.

NATO imesema makombora hayo inayoyatuma Uturuki ni kwa ajili tu ya kujihami lakini Syria na washirika wake wa Urusi na Iran wameushutumu uamuzi huo kwa kusema kwamba unazidisha hali ya ukosefu wa utulivu katika eneo hilo.

KUELEKEA UCHAGUZI KENYA-Mudavadi ajiunga kambi ya Ruto na Uhuru, huku Odinga, Musyoka, Wetangula na Ngilu waunda kambi yao

Waziri mkuu Raila Odinga na makamu wa rais Kalonzo Musyoka wakitia saini muungano wa vyama vyao vya ODM/WIPER/FORD-K/NARC

RFI

NAIROBI-KENYA, Harakati za kisiasa nchini Kenya zimeendelea kushika hatamu kufuatia wagombea mbalimbali wanaowania urais kutangaza miungano yao na vyama vingine kwa lengo la kuhakikisha wanapata ushindi kwenye uchaguzi mkuu wa hapo mwakani.

Muungano wa kwanza ulikuwa ni ule wa vyama vya URP cha mbunge wa Eldoret kaskazini William Ruto na mwenzake wa TNA ambaye pia ni naibu waziri mkuu Uhuru Kenyatta kutiliana saini siku ya Jumapili.
Tarahe 4 ya mwezi huu ndio ilikuwa siku ya mwisho kwa vyama mbalimbali kutangaza miungano yao ambapo waziri mkuu Raila Odinga na chama chake cha ODM kilitangaza kuungana na chama cha Wiper cha makamu wa rais Kalonzo Musyoka na kile cha FORD-K cha Moses Wetangula.
Kuungana kwa waziri mkuu raila Odinga na makamu wa rais Kalonzo Musyoka kulitabiriwa na wachambuzi wa masuala ya siasa ambao walisema kutokana na viongozi hao kuungana mwaka 2002 chini ya mwavuli wa NARC kulikuwa na uwezekano mkubwa pia kwa mwaka huu kuungana kwaajili ya uchaguzi ujao na sasa watakuwa chini ya mwavuli wa CORD.
Katika muungano wao mbali na kuwepo kwa chama cha FORD-K Moses Wetangula, pia mwenyekiti wa chama cha NARC Charity Ngilu alitangaza kujiunga kwenye muungano huo ambao sasa unajumuisha vyam 14.
Viongozi wote kwa pamoja wameapa kuwaunganisha wakenya na kuijenga kenya bora isiyo na migogoro ya kidini wala kikabila kama ilivyojitokeza kwenye uchaguzi wa mwaka 2007/2008.
Katika hatua nyingine naibu waziri mkuu Musalia Mudavadi wa chama cha UDF alitangaza kuungana na William Ruto na Uhuru Kenyatta katika mbio za kuwania kuingia ikulu mwaka 2013.
Wachambuzi wa masuala ya siasa wanaona kuwa licha ya kuwepo miungano ya vyama mbalimbali bado viongozi hao wanachangamoto kubwa ya kuhakikisha wanaondoa ukabila ambao baadhi ya wagombea wametuhumiwa kujiunga kutokana na maeneo wanayotoka.
Muungano wa CORD kati ya Raila Odinga na Kalonzo Musyoka bado wenyewe hawajatangaza ni nani atakayewania kiti cha urais na jambo hilo litaamuliwa kwenye mkutano mkuu wa vyama vyao.(CHANZO RFI)

RAIS ABBAS APOKEWA KISHUJAA PALESTINA .

RAMALLAH,

Amekaribishwa kama shujaa baada ya kufanya Baraza Kuu la Umoja wa Mataifa kupiga kura kupandisha hadhi ya Wapalestina.

Akiwahutubia wafuasi wake mjini Ramallah, Ufukwe wa Magharibi, Rais Abbas alisema njia ilikuwa ndefu na shinikizo nyingi sana, lakini Wapalestina walisimama kidete na kushinda:

"Tulikwenda New York, tumebeba ujumbe wa uchungu na ndoto ya watu wetu kukabidhi kwa ulimwengu ujumbe wa haki na uhuru.

Ulimwengu umetoa kauli kwa sauti kubwa. Umesema: ndio liwepo taifa la Palestina.Haki za Wapalestina, ndio.Uhuru wa Palestina, naam. 

Uhasama, la.Makaazi ya walowezi, hapana.Kuikalia Palestina, sivyo"Alisema rais huyo.(CHANZO BBC)

ANDAKI LAANGUKA NA KUUA WATATU JAPAN-WENGINE WAKWAMA NDANI.

TOKYO ,JAPAN.

Watu watatu wameripotiwa kufariki  jumapili ya leo huko mjini Tokyo Japan baada ya sehemu ya andaki la barabara lenye urefu wa km 4.7  kuanguka na kufunika magari yaliyokuwa yanapita juu yake.kwa mujibu wa televisheni ya Japan juhudi za kuwaokoa watu wengine wliokwama ndai ya andaki hilo zinaendelea.Kumekuwepo na kufuka kwa moshi ingawa vikosi vya kuzima moto nchini humo vimesema vimedhibiti moto huo ingawa kuna dalili za tishio la kuanguka zaidi kwa andaki hilo.

TUTAPUNGUZA MAAMBUKIZI YA UKIMWI-JK

LINDI-TANZANIA, RAIS Jakaya Kikwete ameeleza mikakati ya Serikali yake kuwa ni kuhakikisha inamaliza kabisa maambukizi mapya ya virusi vya Ukimwi ifikapo mwaka 2015.

Akilihutubia taifa kwenye kilele cha maadhimisho ya Siku ya Ukimwi duniani Rais Kikwete alisema: “Tunataka tupunguze maambukizi na ikiwezekana mpaka 2015, kuwe na maambukizi sifuri kabisa. Huu mradi tumeshauanza, ila leo ni kama tunauzindua upya.”

Katika maadhimisho hayo yaliyofanyika kitaifa mkoani Lindi, Kikwete alitaja mikakati mbalimbali aliyosema Watanzania hawana budi kuifuata ili kufikia kwenye hatua hiyo.

Miongoni mwa miakakati hiyo ni kuhamasisha watu kupima, waathirika kutumia Dawa za Kupunguza Makali ya Ukimwi (ARV), kuzuia maambukizi kutoka kwa mama kwenda kwa mtoto, elimu ya Ukimwi kutolewa shuleni na kwamba Serikali yake itahakikisha waathirika wanapata dawa bila malipo.

Alisema kwamba Serikali itahakikisha inaliingiza somo la kujikinga na Ukimwi katika mitalaa ya elimu nchini na kuongeza kuwa atatafuta fedha, ili kuhakikisha kuwa elimu inatolewa kwa watoto hao.

Rais Kikwete alifafanua kuwa katika mpango huo wa kutoa elimu ya Ukimwi kwa wanafunzi,  Serikali imeweza kuwafikia asilimia 65 ya wanafunzi wa shule za msingi na asilimia 75 wa shule za sekondari.

“Wapo wanaosema  tunawafundisha watoto tabia mbaya, lakini hao wanaosema hivyo, ndiyo wamekuwa vinara wa kuwapeleka watoto wao Jando na Unyago,” alisema na kuongeza:

“Mangariba  wanatakiwa kuwapa watoto hawa elimu juu ya Ukimwi,  jinsi ugonjwa huu unavyoambukizwa na jinsi ya kujikinga.”

Aliwataka pia wazazi kutoona aibu kuwafundisha watoto wao jinsi ugonjwa huo unavyoambukizwa na kwamba wakifanya hivyo watakua wameokoa vifo na kumaliza maambukizi mapya.

Kikwete alisema pia kwamba kuna mradi wa kutokomeza maambukizi ya Ukimwi kutoka kwa mama kwenda kwa mtoto, ambapo aliwataka wajawazito kupima afya zao ili waweze kupewa ushauri wa jinsi ya kumkinga motto ili azaliwe bila kuwa na maambukizi.

Alitaja jambo jingine muhimu kuwa ni kuwahimiza Watanzania kupima afya zao kwa hiari na kwamba hadi sasa watu 17 milioni nchini wameshapima.(CHANZO-MWANANCHI)

SIKU YA UKIMWI DUNIANI YAAADHIMISHWA-MAAMBUKIZI YADAIWA YAPUNGUA KWA 50%

Kwa pamoja twaweza kutokomeza UKIMWI

Tarehe 1 desemba  kila mwaka ni  siku ya Ukimwi duniani ambapo dunia inaadhimisha siku hiyo huku ikikabiliwa na changamoto mbalimbali huku Shirika la Afya Duniani, WHO likitoa takwimu zinazoonyesha kuwa maambukizi mapya yamepungua kwa asilimia 50 katika nchi 13 za kusini mwa jangwa la sahara.

Kutokana na takwimu hizo kundi la wazee linaonekana kusahaulika katika takwimu za watu wanaoishi na virusi vya Ukimwi kutokana na kundi hilo kuachwa kando katika suala la maambukizi na mapambano dhidi ya ugonjwa huo.

Pamoja na takwimu za shirika la afya duniani kutoa matumaini makubwa kwa nchi za kusini mwa jangwa la sahara bado nchi za afrika mashariki zinawajibika kuongeza jitihada za kukabiliana na maambukizi na huduma kwa watu wanaoishi na virusi vya ukimwi.

Aidha kuwepo kwa maambukizi mapya kunadaiwa kutokana na mambo mengi huku mapenzi baina ya wanaume kwa wanaume na wanawake kuuza miili yao vikioneka kuchagiza tatizo hilo
Hata hivyo safari bado ni ndefu katika kukabiliana na UKIMWI na muhimu ni kutekeleza kauli mbiu ya mwaka huu inayosisitiza kutokuwepo kwa maambukizi ya kutoka kwa mama kwenda kwa mtoto na maambukizi mapya miongoni mwa jamii na kutokuwepo vifo ifikapo mwaka 2015.
 

RAIS MPYA WA MEXICO APINGWA

Rais mpya wa Mexico Enrique Pena Nieto

Picha na Reuters

Takribani watu 25 wamejeruhiwa katika vurugu kati ya polisi na waandamaji wanaopinga kuapishwa kwa rais mpya wa Mexico Enrique Pena Nieto ambaye alipata ushindi katika uchaguzi wa mwezi julai mwaka huu.

Muda mchache baada ya kuapishwa Rais Pena Nieto alitoa hotuba ambapo ameahidi kuimarisha usalama na uchumi katika nchi hiyo.
Sherehe za kuapushwa kwa rais huyo zilihudhuriwa na viongozi mbalimbali wa kimataifa akiwepo makamu wa rais wa Marekani Joe Biden.
Pena Nito aliibuka mshindi dhidi ya mpinzani wake wa karibu Andre Manuel Lopez Obrador ambaye alipinga matokeo hayo na kudai mpinzani alishinda kwa sababu alinunua kura.
Pena Nieto anaingia madarakani akikabiliwa na jukumu kubwa la kuhakikisha anaendeleza vita ya kupambana na magenge ya wauzaji wa dawa za kulevya ambayo ilianzishwa na mtangulizi wake Felipe Calderon.(CHANZO RFI).